علمنى يا نزف
انجرح وتر الكلام بكت الحروف فى لحظة من عمر الزمن كانت
انكسارى فى اطارات الرفض المكرر
الليل ما فيهوا قمر نجوم
النيل حزين مشروخ صارخ
وين وين الراضعين تمر الضفاف
وين الابنوسين الملامحم صبــاح
رغم العتمة المنشرا فى تضاريس المكان
وين وين القلبم على الموج النخل الطين
المراكبية الترابلة الافندية العمال
الغبار خرب القناديل ودر ملامحنا
مرق الاولاد لبلادا برا ما اتهجوا
الالف الحاء الباء ما قالوا النشيد
بس قالوا يا ام احمد دقى المحلب فى توب احمد
احمد غائب فى الموانى جأنا كلب سونونو صوفر
عضة النخلة لمن جفت اتشتتنا اتبهدلنا جوع كافر خوف
اتشوه حلم الازرق لما يسلام الابيض نازف صدر النيل
اه يا الجرح الغائر صامت فى العيون مرسوم تعاســـــة
وحتى بكره حايرة البوصلة فى شرقوا
كيف اعزف بدايتى الموفقة للنشيد الفى زوايا الحلم
علمنى يا نزف كيف البداية البيها تفترش الشوارع
والارصفة زهور الدهشة الملونة بالعبير والبشاشة
والفال فى الزمن الغبار
علمنى كيف البداية البيها تكتمل دواير الفرح
وتبقى النسمة سوسنة تعطر النسمات فى ليل
القبح المجمل بجلابية الحرير وعصاية الخيزران
ودقون العسكر
علمنى البداية البيها ابقى نجمة فى ليل زينب
وردة فى حلم يقظة وفى اللقيأ ارتعاشة
لون فى عصب لوحة متشابكة القراية
علمنى وزيد علمنى الكتير
ابجديات القبول المفرحة
دوزنة الهزيمة
فرحة المشاوير والرزاز
لون القبلة
طعم ريدى المستريح فى عيون ناعسة بتهاتى بشفع
الغيم كيف يبلل امل الدواخل المتعبة
كيف اسمع صمت الشوق النديان باللهفة
همســـــــــوا
صحراء الحساونة / جنوب ليبيا
6/6/2002