في عيونك ضجة الشوق والهواجس للشـــاعر : أبو ذر عبدالله (الغفاري)

قرفنا وطمت بطن الشعب وعايز يرميكم فى مزبلة التاريخ الفيها براح واسع ليكم ولاعمالكم وبرطعوا فيها زى ما عايزين ياهو مكانكم يا كيزان القبح المقدودة يا حرامية الالفية    يا دجالين     يا سادة الكذب العلنى المفضوح

يا كتالين الشفع والطلاب    يا سجانين الشرفاء وجلادين الفتيات

يا سجانين الشرفاء وجلادين الفتيات    يا عيب السجم الما بتعرفوا العيب

يا كتالين طيور الجنة الفى الاشجار

جاكم يوم الغضب الغضب اليهدم اصنام الزيف الكرتونية

يحرق مشروعكم داك الشيطانى ببيوت اشباحه ودفاعكم الباطل شعبى

وجنجويدكم ديك الجاين من شاد والنيجر

يا ويلكم من غضب الشعب الاكبر القرفان من اعمالكم

ياتجار الدين الفالصوا بضاعتكم الفى الاسواق بايرة وفى مزاد الايدلوجيه العصرية

خلاص الناس طلعت ليك الشارع ياالكوز الما نافع

كسرت حاجز الصمت الوهمى وقامت تصرخ قرفنا قرفنا

وما راجعين لبيوتنا الا انت وعصابتك لبراح مزبلة التاريخ الواسعة

تلحسوا كوعكم وتشوفوا حسابكم مع رب الكون كيف كيف حايكون

قرفنا قرفنا وثورة وثورة وشارع ما حايسكت وبكره وبكره

وبكره وبكره ماهو ضلام  وبكره وردا ما رصاص

وبكره ريشة ومافى سلاح وبكره غنوة وغنوة ما بمبان صينى او ايرانى

او صاروخا اسمه شهاب يحرق فى جبال النوبه

وبكره وبكره مسرح ما بيت اشباح وبكره وبكره

قانونا ما هو نظام عام وبكره وبكره

انتاج من غير سرقة عرق الناس التكدح وبكره قمحا ما جوع

وبكره مستشفى مجانى ومافى فشل كلوى  وبكره وبكره

شفافية ومافى فساد ولا محسوبية ولا قبيلة ولا جهوية ولا جبهجية ولا اونطجيه ولا طائفية  وبكره وبكره

عروسا ليها نغنى عازة فى هواك عازة يا صحراء عازة يا غابة عازة يا نخلة عازة يا تبلدية عازة يا فجرا عشق غبش عشق شفع

وعريسا ليهو نبشر

وشافع ليهو نداعب فى ساحات فيها الخير والوعى

اليرسم لينا الميس الواضح عشان تعرف تجرى خطاوينا الصاح لغايتنا الحرة

يا كيزان اسمعوا السودان ما ملكية لواحد دقنوا كبيرا او لشلوخا معينة فى خدا املس او لراية فيها شعار اقدم من الكسرا البايته

فات زمان الرايات والولاءت واستقلال الناس باسم الدين

السودان للكل السودان للكل

26/12/2011