قعدت اتخيل فى ملامحك جأنى الشوق لون رئيسى
خطط العيون وردة رزاز مطر
وكانت المسافة بين رموشك والعيون دهشة
وقعدت اتخيل فى قوامك نخلة لا تبلدية ممكن
وضحكة نهارتك غيمة مطرزة بفرح شفع
وبى رجعت اجابات المسافات الخرافية لسؤال صعب
عن هوية وانتماء انتماء وهوية حرب وسلام سلام وحرب
قعدت ارسم فى ملامحك جوه فى نبض المشاعر
طاوعتنى الريشة وكانت لحظة ذهول لحظة انبهار
طلعت ملامحك طفلة من زمن الزمن البنهاتى بيهو
بضفاير ومريلة وكراريس وريشة
شخبططت فى الجدار بعفوية صادقة
شمعة ثورة وردة مسافة
بكره كيف بيكون فى حلما
ألمى فى كل بيت
حب فى الطرق الكتيرة
وفى بوادى الغبش عناوين للكرامة والسلام
ولقيتك وعد فى مشاوير بكره بشارة
فرح من غير حدود
يضوى للناس مسارات واضحة فى الزمن الضلام
وتحكى لى عن تفاصيل الحكايات الفى زمان القبح
المزين بالدقون والشعوذة
واحكى ليك عن محطات التشرد
والارصفة المبلولة بوحل المدن المبهرجة
وقدح روب بسمنة
ومشاوير نمشيها فى الرملة
وفى ضى القمرا
ونغنى نغنى للبلد للولد
ونغنى لبكره
ونغنى للتمازج
ونغنى نغنى
وقعدت اتخيل فى ملامحك
تارى ملامحك جواى من زمان
وما حا تغيب