ماانتى الخير
الارض التنضح قمح نخل وخير ماانتى
البلد التكبر
فى وجدان الناس التمشى تفتش لموعد دايم
لمجد البلد
التكدح تنتج كل الخير للشفع الماشين الروضة
المدرسة
الخلوة المسيد حفيانين لابسين عريانين
ما انتى الخير
يا وهج الابنوس اليعطر وجدان البلد
النخلة الطين
النيل
ما انتى الوطن
اليكبر جواى رغم القهر العسكر وكل الزيف
البااسم العدل
والدين والله مايهمهم شول ابكر ادروب ولا
محمد احمد داك
العيان ولا كوكو الفقد الاولاد الانحرقوا
فى نار الزيف
الوالعة وكمان معاهم البقرات وقاعد اباطوا والنجم
ولا النيل
الممدود تعب يصرخ
كل مايهم ديل
كيف الواحد يبنى قصور ويجبى القرش من عرق
الناس التكدح
تشقى
تكدح تعرق
تنتج وما لاحقين بيت جالوص
ما انتى الخير
يا عبير الفل الفايح سماحة وطيبة
فى نفوس الناس
الفى دارفور تجرى تقع وتقوم
وراء العنزات
التدى اللبن للاولاد الما طايلين قلم رصاص
ما انتى الخير
يا عبير النور اليشعل فى الوجدان دروب لبكره
تشرق فيها
شموس الامور الواضحة اللابد تنقال نشيد هتاف
البلد الوطن
الفوق اطماع الزيف كان بالجلابية الكل خيوط حرير
كان بالدقن
كان بالبندقية التفتح فينا جروح وجروح
يبقى ويكبر
فينا السودان بااميالوا المليون لناس ادروب
وكوكو وملوال
وابكر ومحمد احمد
وتكونى الشمس
يا عبير الحب التشرق فى صباح اطفال
الخرطوم
وكوستى وسنار وكمان مدنى وكسلا ومريدى
وياى وانتى
السودان فى عيونى وفى عيون كل زول
يكدح يعرق
ينتج لمجد السودان الواحد
طرابلس /
ليبيا