زينب يا مرافى الفرح التايه فى حزنى المؤصل يا نسمة رشت عتمة نهاراتى الشقية فرح جميل اتمنى بيك انسى تعب المشاوير المرهقة انـــــا
عمرى ضاع بفتش لحضورك المرسوم شعر فى سطر النيل العريـــــــض ولفرح الفراشة اليبقى حدث المدينة وليالى الصندل المفروش بخور ساحات للفرح اليلون كل الامكنة وحليوة تغنى لزول رايد لحظاتا الندية شبالا معطر بالشوق ننشد غناوى الياسمين وزغرودة للعديل والزين .
زينب يا احلى البنات يا شوقا فينى وانا لعيونك مسافـــر
بالشوق بالصمت بالقوافى باالامكنة بخيول العشق المضرجة بالعبير
يا سمحة زى شمسا تعانق رمل الضفاف
يا نسمة دعاش خريفية جايا من اتجاهات
العشق المطيرة موعود بحب ما بتجــــف
ينابيع نوراو الجواك تروى اشجار الفرح
الفى عيونك اشراقة فى الزمـــن الصعب
بريدك زى اطفال المطر الحلموا بقطعـة
رغيف وبيت ما يكون جالـــــــــــــــوص
بريدك يا نبض التواشيح القادرية فى ليلة
زكــــــــر
غنيت هواك يا زينب وكل المدينة
الخرطوم /الحاج يوسف