بكرة الموكب بكرة الموكب
كل يوم بنكتشف نحنا سمحين قدر شنو وكل يوم بنرجع جزء من الفقدناهو في تلتين سنة ظلم وقهر ودهلسة وكذب وغش.
شفنا وقفتنا مع بعض في حريق بيوت المواطنين بالمبمبان، شير الثوار البجازفو حق المواصلات لمكان الموكب عشان قزاز عربية اتكسر، الناس البتتشاكل منو يدفع اكتر في شير غرامات الثوار، الخوف على الزول والزولة الجنبك في الموكب والحرص عليهم، كمية الامان البنحس بيه في نص الموكب.
شفنا الأطباء وهم تلاتة شهور مضربين عن تقديم الخدمات الطبية بالقروش جوا المستشفيات الحكومية، وبشوفو عيانينهم مجان في العنابر والحوادث، المحامين ودفاعهم المستميت عن الثوار ودون مقابل او شكر، ضباط الصحة معانا ووسطنا في نضافة شوارعنا واحياءنا، وغيرهم كتير.
ومابننسى المغتربين الجبرتهم الظروف يعاينو لينا بلهفة في الشاشات وحنيتهم لأرضنا في اللحظات دي.
عشان الحاجات دي واكتر بكرة موكبنا للعمال الناس النضيفة البتاكل الحلال ومن عرقها، حنطوف عليهم ونذكرهم انو نحنا منهم وفيهم، اننا واحد، ومن الظروف ماتشيلو هم.
ده سودانا الزمان وسودانا الجاي، عشان رفعة البلد دي وعشان بكرة، كل يوم بنطلع موكب ورا موكب، إضراب ورا إضراب لحد نرجع حقنا كامل، ندفع جزء من دينا للشهداء ونوفر مستقبل لولادنا.
ليعود سوداننا عالياً بين الأمم، بكرة موكب.
#حنبنيهو وقادرين