في عيونك ضجة الشوق والهواجس للشـــاعر : أبو ذر عبدالله (الغفاري)

الصورة من موكب اليوم الخميس 14 فبراير الخرطوم السوق العربى 

Shahinaz Jamal

اليوم اي زول وصل السوق العربي بيكتشف انو قدر شنو النظام مرتعب و خايف من الثائرات و الثوار ....كونهم يرتعبوا للمدي اليخليهم يحشدوا كل عدتهم و عتادهم العسكري و الأمني .
كونو تقوم مظاهرة الليلة في السوق العربي ده نضال ما بعده نضال...دي اول حاجة اتبادرت لذهني و انا في قلب المعركة اليوم النظام وجه حقيقي كل ترسانته العسكرية... في ظهور لتاتشرات سوداء جديدة كانت منتشرة بكثافة شدييببدة..قدام صيدلية كمبال في شارع الجمهورية (شمال الجامع الكبير) في تمام الواحدة و عشرة دقائق.
المهم في البداية دخلت السوق العربي من جهة جاكسون في تمام الواحدة إلا ربع..مشيت بالحرية طوالي لحدي ما قاصدت ميدان الأمم المتحدة..في تمام الواحدة الا خمسة .
مرت تاتشرات اللونا زي شاي اللبن المكتوب عليها (ج.أ.و_ه.ع ) اللي هي تابعة لهيئة العمليات في جهاز الأمن، تقريبا تمنية عربات في اللحظة ديك مشطت شارع الحرية
إضافة لبكاسي الجهاز المرتكزة يمين مدخل الحرية و دفارات و بكاسي الشرطة المرتكزة شمال مدخل الحرية..المهم لما بدت تاتشرات الجهاز البيجية تمشط الشارع جيئة و ذهابا.غير التاتشرات المرتكزة علي امتداد شارع الحرية و القندول و شارع السيد عبدالرحمن و الجمهورية ...غايتو الليلة كان في تعليمات إنهم يفضوا السوق العربي أولا عشان يستفردوا بالثوار و الثائرات..الليلة امنجية كتااااار كاشفين وشهم..في بكاسي الأمن البيضاء اما في تاتشرات هيئة العمليات كاشفين وشهم بنسبة 25%
بعكس الخميس الفات الليلة العربي كان شبه فاضي و هم قصدوا يرعبوا الفراشة و أصحاب المحلات و الدكاكين عشان يقفلوا و رغما عن كل الترسانة العسكرية و البمبان الكثيف جدا..قام في جاكسون موكب صغير..و الوقائع حولت الهتاف ل الليلة تسقط بس...رص العساكر رص،عشان الثوار يتماسكوا
الاعتقالات كانت من طرف إلا بس كرعينك دي تشيلك.أو تكشف من بعيد.
بالنسبة لي لأني شفت وضع الثائرات و الثوار في نص السوق العربي عددهم أكبر من كل المرات إلا القمع بكافة أشكاله فرق التظاهرات بسرعة
المهم بفتكر الرسالة وصلت أكتر..كونو حولنا أيامهم لمسلسل رعب.
ليلهم الخوف و الكوابيس
و نحن قدامنا الصباح
#تسقط_بس
#مدن_السودان_تنتفض