اللوحة للتشكيلى خالد شطه
غطينى بوهجك دفىء عتمتى المشرورة فى الصباحات التناهد
من حمل مضاعف فى كتوفا ناوية تفج الضلمة صالبة طولا دغرى
توقع فى الطرقات خطوة صارخة تعالى من لحظات جنونى وانعدام الاتجاهات
بتخيلك فراشة حارق حشاها اسعار الدواء والرغيف وبراميل الانتنوف
والميج الروسى
ممقوصىة من رقيص فرعون فى كل فارغة وزفارة لسانوا وافعال المتلصقين فى
ال النبى
تعالى من غبائن 62 حولا ما رشت فيها مطيرة عافية واقف فيها حرازنا
ناشف كر
صيفا وراء صيف
فيها 27 حولا انسدت كل مسارب الضوء فى الافق الفينا
اتمزق فيها عرش القطية الساترة الحال التعبان من اصله
اتقدد جدرانا بفعل الرصاص
كانت وما زالت قطية قش فى طرف جبيل ملان كراكير
نطلع من جواها مصحوبين بدعوات الجد الخمسة وعشرين كبير الكجرة فى داك
الحين
فى الحوش قدحا فيهو عصيدة ودلنق نديان بمريسة متكول فى ضل الشجرة
ناخد كاس لمن نترع وننزل فى القدح الفيهو عصيدة ملاحا كرندو
ونجرى على مدرسة القش ام سته قطاطى ياها فصولنا الطلع من تحتها
كم دكتور ومهندس وكمان ظباط ديش وبوليس
ما عجبم الحال المائل والاقصاء ولا المسكوت عنه معشش
فى العقل الباطن للمنفوخين كذبا المتلصقين فى ال النبى
سايقين فى الوهم الكاذب مصدقين
خطابم منحدر للقاع فى كل مرة
ابدا ما عايزين يعترفوا انه
مسارم معوج محتاج تعديل
رفعوا سلاح فى وش القبح الناتن ناشدين تغير ما تبديل ادوار
او يبفى هناك رايا تانى ما الخيارات
مفتوحة لكل الاحوال
لان الانسانية انهزمت من افعال ناس شوفنين بلا ارضية
ما متصالحين مع ذاتم
منفوخين بنقاء عرقى كاذب والله تقول المان هتلر
والله الغالب فيهم لونا الاغبش دى الزى تراب افريقيا السمحة
الما راضين ينتموا ليها وعايشين فيها
وكمان بى وقاحة يقولوا ديل افارقة عبيد شن لمانا معاهم
دحين العباس وال العباس كانوا سود البشرة ؟
شوف بالله!
لو قلتوا بلال كانت مقبولة ما
هو كمان صحابى ومبشر بالجنة
ولا بلال ما بشرفكم ؟
صباحا عتمة
نهارا عتمة
افقا عتمة
تعالى فجى العتمة
انشرى وهجك فى كل حته
وفى عقول الناس الغبيانة
كان تحيا فيهم الانسانية
تعالى بسفر الانسانية
كان ينصلح الحال
27/12/2016