شرق العتمة لاحت نجمة
كنت شمال القلق الساكن
مد الافق المترامى ديك الليلة
فارغ فنجان القهوة العاشر
كملت قراية جرايد اليوم العشرة
وكل اخبار العالم
تفجير وين مش عارف
مظاهرة فى كم حته
مؤتمرات
طوارى كوراث
مافيش شىء بفرح
دقت ساعة الحيطة اتناشر
عزف الليل البارد لحن الشوق الجواى
جنوب اللحن فى الغنوة كان سولو
من عمق الاحساس فى داك الحين
دوزن دوزن عنف الشوق فى الغنوة
السرحت فى الليل البارد
وقاعد تحلم بى ممكن وما معقول
تفتش لنبضا يورينى السكة
البيها اصل لعمق الدنيا
الفيها وجودك حاضر وباصم زهرة
شد الوتر الخطوات الهب والهب فيها
حرارة الشوق بزيادة
وسعت وسعت الخطوات
قصرت معاها مسافات
خطوة فى خطوة شفت ديك يا ها النجمة قريبة
ارتفع ايقاع الغنوة متناغم مع كل خطوة
ورقصت موجه ضوء فى ديك العتمة
كبرت فينى الامال
بلقيأ وغنوة وسلام بالاحضان
حسيتك جمبى قريب
زادت اتمطت فينى الاشواق
كبرت اكبر من حد الافق المترامى
أشهد يا انتى الشوق مرسال العشق الصادق
ليك فى ليلة اسكندنافية باردة
غطت فيها العتمة شبابيك الضوء
اشهد يا انتى الشوق مرسال العشق الصادق ليك
فى كل لحظة
28/12/2015